ആവിപറക്കുന്ന ചൂടു ചായയും കുടിച്ച്; നല്ല മൊരിഞ്ഞ ബോണ്ടയും കഴിച്ച്, തെരഞ്ഞെടുപ്പു രാഷ്ട്രീയം പറയാന് പുതുപ്പള്ളിയില് ഒരിടമുണ്ട്. ഇരവിനെല്ലൂര് പോസ്റ്റ്ഓഫീസ് പരിസരത്തെ കൃഷ്ണന്കുട്ടിയുടെ ബോണ്ടക്കട.
ഈ പലഹാരക്കട നാടിന്റെ രൂചിയായിട്ട് ഒന്നര പതിറ്റാണ്ടിലേറെയായി. ഒറ്റവാക്കില് പറഞ്ഞാല് നാടന് പലഹാരങ്ങളുടെ സൂപ്പര്മാര്ക്കറ്റാണ് മേച്ചേരിക്കാലായില് കൃഷ്ണന്കുട്ടി ചേട്ടന്റെ കട.
മാവില് ശര്ക്കരയും കടലയും പഴവും തേങ്ങാക്കൊത്തും ചേര്ത്തുണ്ടാക്കുന്ന ബോണ്ടയാണ് ഈ കടയിലെ മാസ്റ്റര് പീസ്. അതുകൊണ്ടു തന്നെയാണ് ഈ കടയ്ക്ക് ബോണ്ടക്കട എന്നു പേരു വന്നതും.
തീര്ന്നില്ല, ചില്ലലമാരയിലും പാത്രങ്ങളിലും നിറഞ്ഞിരിക്കുകയാണു പലഹാരങ്ങള്. മഞ്ഞ നിറത്തില് സുഖമുള്ള സുഖിയനും മടക്കുസാനും വെട്ടുകേക്കും. എണ്ണയില് പൊതിഞ്ഞു മൊരിഞ്ഞിരിക്കുന്ന നെയ്യപ്പം, ഉഴുന്നുവട, ഉള്ളിവട, പഴംപൊരി അങ്ങനെ നീളുകയാണ് ഇവിടത്തെ പലഹാരങ്ങള്. ബോണ്ടക്കടയിലെ പലഹാരങ്ങളുടെ രുചിയറിയാന് അന്യനാട്ടിൽനിന്നുവരെ ആളുകള് എത്താറുണ്ട്.
ഈ തെരഞ്ഞെടുപ്പുകാലത്ത് നേതാക്കളുടെ ചായകുടിശാലയും വര്ത്തമാനകേന്ദ്രവും ബോണ്ടക്കടയാണ്. വിറകടുപ്പിലാണ് ഇവിടെ പലഹാരങ്ങള് തയാറാക്കുന്നത്.
രാവിലെ ഏഴിന് കൃഷ്ണന്കുട്ടിയും ഭാര്യ സുശീലയും കടയിലെത്തും. സഹായത്തിന് ആളുകളുണ്ട്. രാത്രി ഒമ്പതു വരെ നല്ല തിരക്കാണ്. പാഴ്സല് വാങ്ങാനും ധാരാളം പേരെത്തുന്നുണ്ട്.
പുതുപ്പള്ളിയിലെ തെരഞ്ഞെടുപ്പുകാലത്ത് പ്രചാരണത്തിനെത്തിയ മന്ത്രിമാരും എംപിമാരും എംഎല്മാരും ബോണ്ടക്കടയിലെത്തുന്നു. തെരഞ്ഞെടുപ്പുകാലത്തെ പുതുപ്പള്ളിയുടെ ചര്ച്ചാകേന്ദ്രവും ഇഷ്ടകേന്ദ്രവുമായി ബോണ്ടക്കട മാറിയിരിക്കുകയാണ്.
