കേന്ദ്രഭരണപ്രദേശമായ പുതുച്ചേരിയില്‍ ഭരണത്തുടര്‍ച്ച ഉറപ്പിച്ച്‌ എന്‍ഡിഎ.30 അംഗ നിയമസഭയിലെ കേവലഭൂരിപക്ഷമായ 16 സീറ്റുകളില്‍ എന്‍ഡിഎ വിജയമുറപ്പിച്ചു. എന്‍ഡിഎയിലെ മുഖ്യകക്ഷിയായ ഓള്‍ ഇന്ത്യ എന്‍ആര്‍ കോണ്‍ഗ്രസ് (എഐഎന്‍ആര്‍സി) ഒന്‍പതു സീറ്റുകളില്‍ വിജയിച്ചു. മൂന്നു സീറ്റില്‍ അവര്‍ ലീഡ് ചെയ്യുന്നുണ്ട്. സഖ്യകക്ഷിയായ ബിജെപി മൂന്ന് സീറ്റില്‍ വിജയിക്കുകയും ഒരു സീറ്റില്‍ ലീഡ് ചെയ്യുകയുമാണ്. എഐഎന്‍ആര്‍സി സ്ഥാപകനും മുഖ്യമന്ത്രിയുമായ എന്‍. രംഗസ്വാമി, തട്ടാഞ്ചാവടി മണ്ഡലത്തില്‍നിന്ന് വിജയിച്ചു.
കോണ്‍ഗ്രസ്-ഡിഎംകെ-വിസികെ സഖ്യത്തില്‍, ഡിഎംകെ ഒരു സീറ്റില്‍ ജയിക്കുകയും നാല് സീറ്റില്‍ ലീഡ് ചെയ്യുന്നുമുണ്ട്. നടന്‍ വിജയിന്റെ ടിവികെയും പുതുച്ചേരിയില്‍ അക്കൗണ്ട് തുറന്നു. രണ്ട് സീറ്റിലാണ് അവര്‍ വിജയിച്ചത്. മൂന്ന് സീറ്റുകളില്‍ സ്വതന്ത്രരും വിജയിച്ചിട്ടുണ്ട്. കതിര്‍കാമം, നെടുങ്കാട്, മാഹി എന്നിവിടങ്ങളിലാണ് സ്വതന്ത്രര്‍ ജയിച്ചത്. ഇതില്‍ മാഹിയിലെ സ്ഥാനാര്‍ഥിയായ അഡ്വ. ടി. അശോക് കുമാര്‍ എല്‍ഡിഎഫ് സ്വതന്ത്രനാണ്.