പുനലൂരിൽ എൻ.എസ്.എസിന്റെ പത്മാകഫേ ഉദ്ഘാടനവുമായി ബന്ധപ്പെട്ട് മുൻ മന്ത്രി കെ.ബി. ഗണേഷ് കുമാർ രൂക്ഷ വിമർശനവുമായി രംഗത്തെത്തി. താൻ നേതൃത്വം നൽകി സജ്ജമാക്കിയ പത്മാകഫേയുടെ നിർമ്മാണവുമായി ബന്ധപ്പെട്ട് തനിക്കെതിരെ വ്യാജ പ്രചാരണം നടത്തിയവർ ഇപ്പോൾ യാതൊരു ലജ്ജയുമില്ലാതെ അതിന്റെ പിതൃത്വം ഏറ്റെടുക്കുകയാണെന്ന് അദ്ദേഹം ഫേസ്ബുക്ക് പോസ്റ്റിലൂടെ ആരോപിച്ചു. മാധ്യമങ്ങളിലൂടെയാണ് ഉദ്ഘാടന വിവരം അറിഞ്ഞതെന്നും ഇതിൽ സന്തോഷമുണ്ടെന്ന് വ്യക്തമാക്കി അഭിമാനബോധത്തോടെ ആശംസകൾ നേരുന്നുവെന്നും ഗണേഷ് കുമാർ കൂട്ടിച്ചേർത്തു. എൻ.എസ്.എസ് ജനറൽ സെക്രട്ടറി ജി. സുകുമാരൻ നായരാണ് ഇന്ന് പത്മാകഫേ ഉദ്ഘാടനം ചെയ്യുന്നത്.