കാസർകോട് പെരിയയിലെ യൂത്ത് കോൺഗ്രസ് പ്രവർത്തകരായ കല്യോട്ടെ കൃപേഷ്, ശരത് ലാൽ എന്നിവരെ കൊലപ്പെടുത്തിയ കേസിലെ പ്രതികൾക്കുള്ള ശിക്ഷ എറണാകുളം സിബിഐ പ്രത്യേക കോടതി ഇന്നു വിധിക്കും. വിചാരണ നേരിട്ട 24 പ്രതികളിൽ 14 പേർ കുറ്റം ചെയ്തതായി കോടതി കണ്ടെത്തിയിരുന്നു.
ഒന്നു മുതൽ എട്ടുവരെ പ്രതിക ളായ എ. പീതാംബരൻ, സജി സി. ജോർജ്, കെ.എം.സുരേഷ്, കെ. അനിൽകുമാർ (അബു), ഗിജിൻ, ആർ. ശ്രീരാഗ് (കുട്ടു), എ. അശ്വിൻ (അപ്പു), സുബീഷ് (മണി), പത്താംപ്രതി ടി. രഞ്ജിത്ത്(അപ്പു), 15-ാം പ്രതി എ.സുരേന്ദ്രൻ (വിഷ്‌ണു സുര) എന്നിവർക്കെതിരെ ജീവപര്യന്തം മുതൽ വധശിക്ഷവരെ ലഭിക്കാവുന്ന കൊലക്കുറ്റം അടക്കമുള്ള ഗുരുതര വകുപ്പുകളാണു കോടതി ചുമത്തിയിട്ടുള്ളത്.
14-ാം പ്രതി കെ.മണികണ്ഠൻ, 20-ാം പ്രതി മുൻ എംഎൽഎ കെ.വി. കുഞ്ഞിരാമൻ, 21-ാം പ്രതി രാഘവൻ വെളുത്തോളി (രാഘവൻനായർ), 22-ാം പ്രതി കെ.വി. ഭാസ്കരൻ എന്നിവർ ക്കെതിരെ രണ്ടു വർഷം വരെ തടവുശിക്ഷ ലഭിക്കാവുന്ന തെളിവു നശിപ്പിക്കലും പ്രതികളെ സഹായിക്കലുമാണു കോടതി ചുമത്തിയ കുറ്റങ്ങൾ. വിചാരണ നേരിട്ട 10 പ്രതികളെ കോടതി തെളിവുകളുടെ അഭാവത്തിൽ വിട്ടയച്ചിരുന്നു. വിചാരണ നേരിട്ട എല്ലാവരും സിപിഎം പ്രവർത്തകരും പ്രാദേശിക നേതാക്കളുമാണ്.2019 ഫെബ്രുവരി 17നു രാത്രി 7.45നാണു കൊലപാതകം നടന്നത്.