കോഴിക്കോട് മുൻ പോലീസ് അസിസ്റ്റന്റ് കമ്മീഷണർ എ. ഉമേഷിന്റെ സസ്പെൻഷൻ പിൻവലിച്ച് സർവീസിൽ തിരിച്ചെടുത്ത ഉത്തരവ് മരവിപ്പിക്കാൻ ആഭ്യന്തരമന്ത്രി രമേശ് ചെന്നിത്തല നിർദേശം നൽകി. കോഴിക്കോട് ജില്ലയിൽ ഇതുമായി ബന്ധപ്പെട്ട് കോൺഗ്രസിൽ ശക്തമായ പ്രതിഷേധം ഉയർന്നതിനെത്തുടർന്നാണ് ഈ നടപടി. ചേവായൂർ ബാങ്ക് തിരഞ്ഞെടുപ്പിൽ സി.പി.എമ്മിന് ഉമേഷ് സഹായം ചെയ്തുവെന്നടക്കമുള്ള ആരോപണങ്ങൾ ഉയർന്ന പശ്ചാത്തലത്തിൽ, ചേവായൂരിൽ നിന്നുള്ള കോൺഗ്രസ് നേതാക്കൾ ആഭ്യന്തരമന്ത്രിയെ നേരിട്ട് കണ്ട് എതിർപ്പ് അറിയിച്ചതിനെത്തുടർന്നാണ് ഉത്തരവ് മരവിപ്പിച്ചത്.